Душанбе. 27-уми феврал. ОИ «Азия-Плюс» - Дар шимоли Тоҷикистон 6 нафар зери тарма монда, ба халокат расиданд.

Тавре ба ОИ «Азия-Плюс» аз Кумитаи ҳолатхои изтирории ҷумҳурӣ хабар доданд, вазъи фавқулъодда субҳи 26-уми феврал дар километри 71-уми шоҳроҳи Душанбе-Хуҷанд ба амал омад.

Ба иттилоъи манбаъ, афроди ба ҳалокат расида дар як мошини тамғаи «Тойота Рав-4» таҳти идораи сокини 55-солаи ноҳияи Панҷакент Абдухалил Наврӯзов аз пойтахт самти вилояти Суғд ҳаракат мекарданд, ки тақрибан то 300 метр аз даромадгоҳи нақби Истиқлол ногаҳон тарма фурӯ рехта, мошинро ба коми худ кашид.

  Дар натиҷаи ин ҳодиса, ронанда ва 5 мусофири ӯ - сокинони вилояти Суғд   Абдубасир Худоёрови 50-сола, духтарони 13 ва 22-солаи ӯ Насиба ва Мастонаи Абдубасир, Маҳфузаи Хусрави 17-сола ва донишҷӯи 22-сола аз ноҳияи Айнӣ Фирдавс Одинаев ҷони худро аз даст доданд. Барои таҳқиқи ин ҳодиса ба маҳали фоҷеа кормандони кумитаи ҳолатҳои изтирорӣ ва мақомоти корҳои дохила сафарбар шудаанд.