Душанбе. 1-уми июл. ОИ «Азия-Плюс» - Шабонарӯзи гузашта дар се садамаи нақлиёт дар қаламрави Тоҷикистон 8 нафар ба ҳалокат расиданд.

Чӣ тавре ки ба ОИ «Азия-Плюс» аз Вазорати умури дохилии ҶТ иттилоъ доданд, дар ноҳияи Истаравшан автомашинаи «Опел-Астра» ба автомашинаи навъи ГАЗ-3302 бархӯрда, дар натиҷа ронандаи «Опел-Астра» ва се мусофири он ба ҳалокат расидаанд. «Худи ҳамон рӯз ҳангоми ҳаракат аз Кӯлоб ба самти ноҳияи Шӯрообод ронандаи автомашинаи ГАЗ-53 Бегалӣ Қурбонов аз ӯҳдаи идораи мошин набаромада, он чаппа мешавад ва дар натиҷа худи ронанда ва ду мусофири он ҳалок мешаванд», - гуфт манбаъ.

Бино ба иттилои манбаъ, ҳамчунин дар ноҳияи Сарбанд автомашинаи навъи «Чанху» ба автомашинаи МАЗ бархӯрда, мусофири «Чанху» дар роҳи интиқол ба беморхона фавтидааст.