Душанбе. 13-уми май. Азия-Плюс — Дар шаҳри Душанбе кормандони Агентии назорати маводи нашъаовари назди президенти Тоҷикистон миқдори зиёди ҳабҳои нашъаовари «экстази»-ро мусодира намуданд.

Тавре ба ОИ «Азия-Плюс» аз агентии мазкур иттилоъ доданд, зимни баргузории корҳои фаврӣ-ҷустуҷӯйӣ дар қаламрави пойтахт ҳангоми фурӯши ҳабҳои (таблеткахои) MDMA, ки бештар чун «эсктази» маъруфанд, шаҳрванди 34-солаи кишвар боздошт гардида, ҳамчунин зимни азназаргузаронии манзили зисти иҷораи ӯ панҷ бастаи селлофании дорои ҳудуди 500 дона ҳабҳои нашъаовари  «метилендиоксиметамфетамин» (MDMA, экстази) дарёфт ва мусодира карда шудааст.

Зикр гардид, ки бино ба маълуоти пешакӣ, боздоштшуда ин ҳабҳоро аз як шаҳрванди Афғонистон харида, ният доштааст, ки онро бо арзиши аз 20 то 30 доллари ИМА барои ҳар як донааш фурӯшад.

Коршиносон хатари зиёди ин маводи муаддири синтетикӣ – вобастагии зуди равониро, ки ба харобии ҷиддии рӯҳияву асаб боис мегардад,  таъкид менамоянд.

Қоибили зикр аст, ки соли равон кормандони Агентии назорати маводи нашъаовари назди президенти ҷумҳурӣ аз муомилоти ғариқонунӣ беш аз 460 кило маводи мухаддирро мусодира намуданд, ки нисбат ба ҳамин давраи соли гузашта ба андозаи 49,3% зиёдтар аст.