Хуҷанд. 15-уми июл. «Азия-Плюс» — | Шаби 13 ба 14-уми июл дар ду бинои истиқоматии шаҳри Чкаловски вилояти Суғд сӯхтор сар зад.

Тавре ба ОИ «Азия-Плюс» аз Раёсати хадамоти давлатии оташнишонии вилоят хабар доданд, сӯхтор дар бинои истиқоматии № 65-и кӯчаи Осипенко соати сеи шаб ба вуқӯъ пайваста, дар натиҷаи шамоли сахт он ба бинои истиқоматии ҳамсоя гузаштааст. Майдони умумии сӯхтор, ки ду бинои манзили истиқоматиро фаро гирифт, 180 метри мураббаъро ташкил додааст. Ба сӯхторнишинони ба ҷойи ҳодиса ҳозиршуда муяссар гардидааст, ки дар муддати якуним соат оташро пурра хомӯш кунанд.

«Бар асари сӯхтор сокини 33-солаи бинои истиқоматии № 65 Илҳом Даминов ба ҳалокат расид. Айни замон сабабҳо ва ҳаҷми зарари расида аз сӯхтор муайян карда мешаванд. Танҳо маълум аст, ки ба сӯхторнишинон муяссар гардидааст, ки амволи арзишманд ба маблағи 32 ҳазор сомониро аз оташ эмин нигаҳ доранд», - афзуд манбаъ.