Бар асари як садамаи нақлиёт дар минтақаи ҷануби кишвар 4 нафар, аз ҷумла ду кӯдак ҳалок ва 7 тан ҷароҳат бардоштанд.

Тавре ба ОИ «Азия-Плюс» аз Вазорати корҳои дохилии ҷумҳурӣ хабар доданд, дар километри 64-уми роҳи мошингарди Душанбе-Қӯрғонтеппа, дар қаламрави ноҳияи Хуросон ронандаи автомашинаи тамғаи «Опел-Вектра» А.Х.-и 26-сола бо автомашинаи тамғаи «Опел-Астра» таҳти идораи М. М.-и 19-сола дар як саф карор гирифта, аз ӯ гузаштанӣ мешавад, вале автомашинаи «Опел-Астра» ба ин монеъ мегардад, ки дар натиҷа автомашинаҳо ба ҳам бармехӯранд.

«Ба асари зарба автомашинаи «Опел-Астра» ба самти муқобили ҳаракати роҳ баромада, ба чуқурие сарозер меафтад. Ин ҳангом автомашинаи тамғаи «ДЭУ-Сиело» аз самти муқобили ҳаракат ба автомашинаи дар байни роҳ истодаи «Опел-Вектра» бармехӯрад», - гуфтанд дар ВКД.

Бино ба иттилои манбаъ, ронандагони автомашинаҳои тамғаи «Опел» ва мусофирони автомашинаи «Опел-Астра» -  кӯдакони соли таваллуди 2010 ва 2011 дар ҷойи ҳодиса ба ҳалокат расидаанд.

«Ду нафар мусофирони автомашинаи тамғаи «ДЭУ-Сиело» ва панҷ нафар мусофирони автомашинаи «Опел-Астра», аз ҷумла ду нафар кӯдакон ҷароҳатҳои гуногуни ҷисмонӣ бардошта, дар беморхона бистарӣ шуданд», - афзуд манбаъ.