Бар асари ба хатти баландшиддати барқ афтодани кран дар минтақаи Маҷмаии манзилҳои зисти Ҷавонон (собиқ бозори Баракат), қисмати зиёди маркази шаҳри Душанбе бебарқ монд. Кохи президенти Тоҷикистон низ бе «равшанӣ» монд.

Тавре ба ОИ «Азия-Плюс» сухангӯйи ширкати «Барқи тоҷик» Нозирҷон Ёдгорӣ хабар дод, айни замон ба як қатор манзилҳои зист, муассисаҳои давлатӣ ва иншоот барқ тавассути хатҳои алтернативӣ интиқол дода шуда истодааст.

«Аз садама касе осеб надид», - гуфт Ёдгорӣ. Ба қавли вай, айни замон дар макони ҳодиса якчанд бригадаҳои садамавӣ машғули коранд.

Мақомоти раҳбарии ШСХК «Барқи тоҷик» ва муассисаи шабакаҳои барқи пойтахт дар ҷойи ҳодиса ҳузур доранд.

Дар ширкати «Барқи тоҷик» итминон медиҳанд, ки дар фурсати наздиктарин интиқоли нерӯи барқ ба биноҳову иншооте, ки бебарқанд, барқарор мегардад.