Дар маркази шаҳри Душанбе ба болои як автомобили ҳаракатдошта дарахт афтод. Бар асари он мусофири автомашина дар ҷойи ҳодиса ба ҳалокат расида, ронанда бо ҳолати вазнин дар бемористон бистарӣ шудааст.

Ин ҳодиса тахминан соатҳои 15:00 дар кӯчаи Пушкин, дар муқобили фабрикаи «Гулистон» ба вуқӯъ пайваст. Дар ҷойи ҳодиса издиҳоми зиёди мардум гирд омадаанд. Корҳои тозакунии роҳ идома доранд. Айни замон кормандони Бозрасии давлатии автомобилӣ ҳаракати нақлиёт дар қисмати роҳи мазкур, яъне буриши кӯчаҳои Бохтар, Пушкин, Бухоро ва Теҳронро маҳдуд кардаанд.

Тавре як манбаъ аз Кумитаи ҳолатҳои фавқулода ва мудофиаи граждании назди ҳукумати ҷумҳурӣ хабар дод, зимни ҳаракат ба болои автомобили тамғаи «Нексия» дарахт меафтад. Мусофири он дар ҷойи ҳодиса ба ҳалокат расида, ронанда бо ҳолати вазнин ба бемористон мунтақил шудааст. Бино ба маълумоти Кумитаи мазкур, дарахт ба қисмати роҳи мошингузар ё ба вазнинии барф тоб наоварда афтодааст, ё шояд ба ин корҳои сохтмонӣ, ки бевосита дар наздикии он гузаронида мешаванд, боис шуда бошанд. Дар ҷойи ҳодиса кормандони КҲФ машғули коранд ва сабабҳои ҳодисаи мазкурро муайян мекунанд.

Айни замон гирифтани шарҳу тавзеҳоти расмӣ дар бораи шумори осебдидагон ва сабабҳои рух додани ҳодиса муясссар нагардид.