Рӯзи гузашта се нафар шаҳрвандони ҷумҳурӣ зери чархи мошин монда, ба ҳалокат расиданд.

Бино ба маълумоти Вазорати корҳои дохилии ҶТ, дар километри 227-уми роҳи мошингарди Душанбе-Хуҷанд Бобо Муродови 48-сола зери чархи автомашинаи тамғаи «БМВ-520» таҳти идораи сокини 44-солаи шаҳри Истаравшан Дилором Отабекова монда, аз ҷароҳатҳои бардошта дар ҷойи ҳодиса ба ҳалокат расидааст.

Худи ҳамон рӯз дар шаҳри Панҷакент ронандаи трактори «Т-40», сокини 26-солаи ҷамоати Суҷина Суннатулло Бойназаров аз уҳдаи идораи воситаи нақлиёт набаромада, бо трактор Шоҳсанам Маҳмадисоеваи 18-соларо пахш мекунад, ки дар натиҷа ӯ дар ҷойи ҳодиса фавтидааст.

Ғайр аз ин, бар асари садамаи нақлиёте, ки дар кӯчаи ба номи Турсунзодаи пойтахт аз ҷониби ронандаи автомашинаи «Дэу», сокини 23-солаи шаҳри Норак ба вуқуъ пайваст, роҳгузар, сокини 16-солаи пойтахт Илҳом Одинаев ба ҳалокат расид.