Бар асари садамаи нақлиёт дар вилояти Суғд толибилми синфи 10-уми шаҳри Чкаловск Мастура Саидбеекова ба ҳалокат расид.

Тавре ба ОИ «Азия-Плюс» аз Раёсати ВКД ҶТ дар вилояти Суғд хабар доданд, нимаи рӯзи 15-уми ноябр ронандаи автомашинаи тамғаи «Муссо», сокини 59-солаи ноҳияи Ишкошими ВМКБ Мулло Муллоев наврасро ҳангоми аз роҳ гузаштан бо воситаи нақлиёт пахш намуда, ӯ бо ҷароҳатҳои вазнин ба бемористон мунтақил мегардад ва рӯзи 20-уми ноябр ба ҳалокат расидааст.

Ба иттилои манбаъ, аз рӯи ин далел нисбат ба М.Муллоев мутобиқи моддаи 212, қ.2-и КҶ ҶТ (Вайрон кардани қоидаҳои ҳаракатӣ роҳ ва истифодаи воситаҳои нақлиёт, ки аз беэҳтиётӣ боиси марги инсон инсон гаштааст) парвандаи ҷиноӣ боз шуда, тафтишот идома дорад.

Бино ба маълумоти Раёсати ВКД ҶТ дар вилояти Суғд, соли равон дар роҳҳои мошингарди минтақаи шимоли ҷумҳурӣ 70 ҳодисаи садамаи нақлиёт бо иштироки ноболиғону кӯдакон (ҳамин давраи соли 2011 – 71 ҳодиса) ба қайд гирифта шудааст, ки бар асари он 26 нафар ноболиғон (соли 2011 – 23 нафар) ба ҳалокат расидаанд.