Бар асари ба ҷарии 300-метра сарозер рафтани автомашина дар ноҳияи Айнии вилояти Суғд, ронанда ҳалок ва мусофири он ба бемористон бистарӣ шудааст.

Тавре ба ОИ «Азия-Плюс» аз Раёсати ВКД ҶТ дар вилояти Суғд иттилоъ доданд, рӯзи якшанбе зимни ҳаракат дар роҳи мошингарди Душанбе-Хуҷанд, дар километри 153-уми роҳ ронандаи автомашинаи тамғаи «Мерседес-Бенс», сокини ноҳияи Ҳисор, донишҷӯи соли сеюми Донишкадаи ҳуқуқ ва андози шаҳри Душанбе Бахтовар Нуралиеви 25-сола аз уҳдаи идораи воситаи нақлиёт набаромада, автомашина ба ҷарӣ сарозер меравад.

«Дар натиҷа ронанда дар ҷойи ҳодиса ба ҳалокат расида, мусофири он – сокини 26-солаи ноҳияи Спитамени вилояти Суғд Мақсуд Сангинов бо ҷароҳатҳои вазнин ба бемористони ноҳияи Айнӣ бистарӣ шудааст», - гуфтанд дар раёсати мазкур.

Бино ба маълумоти Шуъбаи БДА-и Раёсати ВКД ҶТ дар вилояти Суғд, моҳи феврали соли ҷорӣ дар роҳҳои мошингарди минтақаи шимоли ҷумҳурӣ 45 ҳодисаи садамаи нақлиёт (ҳамин давраи соли гузашта – 41 ҳодиса) ба қайд гирифта шуда, бар асари он 21 нафар ҳалок (соли 2012 – 24 нафар) ва 51 нафар (соли 2012-38 нафар) ҷароҳатҳои гуногун бардоштаанд.