Сӯхтори шоми дирӯз дар бозори «Фаровон»-и шаҳри Қӯрғонтеппа сарзада дар муддати якуним соат аз ҷониби 11 дастаи оташнишонон хомӯш карда шуд.

Бино ба маълумоти ВКД ҶТ, сӯхтор майдони тақрибан 30%-и қаламрави бозорро фаро гирифта, барои хомӯш кардани он тамоми қувваи мақомоти корҳои дохилӣ, Кумитаи ҳолатҳои фавқулода, Кумитаи давлатии амнияти миллӣ ва дигар сохторҳои ҳукуматӣ сафарбар карда шуданд.

Ба иттилои манбаъ, сӯхтор дар яке аз мағозаҳои фурӯши бозичаҳои кӯдакона сар зада тахмин меравад, ки аз ҳисоби расиши ноқилҳои барқӣ ба вуҷуд омадааст.

Гуфта мешавад, барои муайян намудани сабаби асосии сӯхтор аз ҳисоби кормандони ботаҷрибаи мақомотҳои корҳои дохилӣ, прокуратура, кумитаҳои амнияти миллӣ ва ҳолатҳои фавқулода  гӯруҳи корӣ таъсис дода, санҷиши пешаки оғоз ва инчунин лабораторияи  Сарраёсати хадамоти давлатии оташнишонии ВКД  ба ҷои ҳодиса сафарбар карда шудааст. Талафоти ҷонӣ нест.