Дар феҳристи «Рейтин-пешгӯӣ»-и заминларзаҳо дар соли 2014 барои кишварҳои қисмати марказии минтақаи Авруосиё, ки аз ҷониби шаҳрванди Қазоқистон Сергей Брешук таҳия шудаву дар он 12 кишвари ҷаҳон зикр шудаанд, Тоҷикистон мақоми сеюмро касб намудааст.

Дар сомонаи шахсиаш Брешук зикр кардааст, ки соли 2014 дар минтақаҳои дурдасти кӯҳистон ва қисмати марказии Тоҷикистон аз ду заминларзаи назаррас интизорӣ меравад ва дар минтақаи наздики сохтмони нерӯгоҳи Роғун низ заминларзахои начандон шадид аз эҳтимол дур нест.

Гуфта мешавад, сомонаи «Небесный патрул» аввали соли 2011 аз ҳисоби воситахои шахсии муаллиф таҳия гардида, лоиҳа тиҷоратист ва барои пешгӯии заминларза 2700 доллари ИМА дар як моҳ ҳаққи хизмат гирифта мешавад. Дар сомона зикр мегардад, ки афзалияти барномаи «Небесный патруль» дар имконоти мониторинги фосилавии саривақтиву зуди ҳама гуна иншоот дар саросари ҷаҳон ва бидуни баргузор кардани корҳои амалӣ ифода меёбад.

Аз Пажуҳишгоҳи зилзилашиносии Академия улуми ҶТ ба И «Азия-Плюс» дар ин робита иттилоъ доданд, ки дар ин пешгӯӣ асосҳои илмӣ вуҷуд надоранд ва ба ин рейтинг муносибати ҷиддӣ дошта наметавонанд.

Дар пажуҳишгоҳ мутмаинанд, ки «ба пешгӯии ҳодисаҳои заминрларза ҷиддӣ мебояд муносибат кард, то ки вазъ дар ҷоема ноором нашавад. «Гузашта аз ин, падидаҳои мушкили табииро на «афроди хусусӣ», балки олимон бояд пешгӯӣ кунанд», - гуфтанд дар ин муассисаи илмӣ.

Дар ҳамин ҳол, дар рейтинги шаҳрванди Қазоқистон минтақаи Эрони Шимолӣ – зинаи 1-ум, Озарбойҷону Туркманистон – ҷойи 2-юм, Тоҷикистон – зинаи 3-юм, вилояти Синтзян-Уйғури Чин – мақоми 4-ум, Ӯзбекистон – мақоми 5-ум, Қазоқистон – зинаи 6-ум ва Қирғизистон – ҷойи 7-умро ишғол намудаанд.