Бар асари садамаи нақлиёти дар роҳи мошингарди Душанбе-Хуҷанд, дар қаламрави деҳаи Такфони ноҳияи Айнӣ рухдода се нафар ба ҳалокат расиданд.

Бино ба иттилои сомонаи расмии ВКД ҶТ, ронандаи автомашинаи тамғаи «Дулон» таҳти идораи сокини шаҳри Ваҳдат Тоҳир Назриеви 32-сола ҳангоми ҳаракат дар шоҳроҳи Душанбе-Хуҷанд дар натиҷаи канда шудани куҳпора ва фаро гирифтани чангу ғубори ғафс дар роҳ, аз ӯҳдаи идораи воситаи нақлиёт набаромада, ба нишебии чуқуриаш 100 метр сарозер шудааст.

Гуфта мешавад, дар натиҷаи ин ҳодисаи нохуш ронанда ва ду нафар мусофири автомашина сокини шаҳри Ваҳдат Мустақим Гулови 27-сола ва сокини шаҳри Душанбе Мавҷуда Бобоеваи 22-сола дар ҷойи ҳодиса ба ҳалокат расидаанд.