Дар мавзеи Каслии роҳи мошингарди Челябинск – Екатеринбург қариби соати 7-и субҳи имрӯз  бар асари бархӯрди микроавтобусҳои «Опел» ва «Газел» ба ҳамдигар се нафар ҷон бохтаанд, ки ду нафарашон шаҳрванди Тоҷикистон ва як нафар шаҳрванди Ӯзбекистон будаанд.

Бино ба иттилои котиби матбуотии намояндагии Хадамоти муҳоҷирати назди ҳукумати ҶТ дар Русия Иброҳим Аҳмадов, шахсияти шаҳрвандони фавтидаи Тоҷикистон муайян карда шуда, инҳо сокини 56-солаи деҳаи Зоосуни ноҳияи Айнии вилояти Суғд Шодӣ Шодиев ва сокини 29-солаи деҳаи Доваи ноҳияи Рашт Зоҳирҷон Раҳимов будаанд.

Ба иттилои манбаъ, айни замон дар ҷойи ҳодиса корҳои тафтишотӣ роҳандозӣ шуда, дар бораи натиҷаҳояш ба таври иловагӣ хабар дода мешавад.

Зикр мегардад, ки замони бархӯрд дар автомашинаи «Опел», ки аз шаҳри Челябинск ба шаҳри Екатеринбург раҳсипор будааст, 8 нафар мусофир қарор дошта, 5 нафари онҳо осеб надидаанд.