Бар асари як муноқиша дар тарабхонаи шаҳри Маскав бо номи «Лунф ноч» шаҳрванди Тоҷикистон Назаров Дилшод Далерович аз зарби корд ҷароҳат бардошта, ба ҳалокат расид. Дар ин бора дар торнамои расмии ҳаракати ҷамъияти умумирусиягии «Муҳоҷирони меҳнатии тоҷик» хабар дода мешавад.

Тибқи иттилои расида ба телефони ҳаракат рӯзи 31-уми март соати 4-и субҳ, сокини деҳаи Сайёди ноҳияи Шаҳритӯс Назаров Дилшод Далеровичи 22-сола дар натиҷаи задухӯрди рухдода миёни ҳамдиёрон, зодагони Тоҷикистон аз зарби корд ҷароҳат бардошта, каме баъдтар дар бемористон ба ҳалокат расидааст.

«Кормандони шуъбаи тафтишоти ноҳияи Водний ҷиҳати боздошти ҷинояткори ғайбзада тадбир меандешанд. Шахсияти кушторро содирнамуда муайян карда мешавад», - омадааст дар иттилои торнамо.

Зимнан зикр мегардад, ки ахиран ҳодисаҳои куштор миёни муҳоҷирон дар ҳоли афзоиш қарор дошта, муноқишаҳои миёни ҷавонон аксаран ба кордкашӣ анҷом мепазиранд.