Шаби 19 ба 20-уми сентябр дар комбинати гӯшти шаҳри Қӯрғготеппа сӯхтор сар зада, бар асари он ду нафар ҳалок шуданд.

Котиби матбуотии хадамоти оташнишонии вилояти Хатлон Суҳроб Қулмаҳмадов ба «Азия-Плюс» дар ин робита иттилоъ дод, ки сӯхтор тахминан соатҳои 1-и шаб дар коргоҳи қаннодии дохили корхона рух дода, бар асари сӯхтор ду нафар донишҷӯёни Донишгоҳи давлатии Қӯрғонтеппа ба ҳалокат расидаанд.

«Майдони фарогири сӯхтор 84 метри мураббаъро ташкил дода, дастаҳои оташнишонӣ дарҳол ба макони ҳодиса сафарбар шуданд. Коргоҳи қаннодӣ комилан ба коми оташ рафт ва сабабҳои сар задани сӯхтор таҳқиқ мешаванд», - афзуд котиби матбуотӣ.

Дар ҳамин ҳол, бино ба маълумоти як манбаъ аз Донишгоҳи давлатии Қӯрғонтеппа, бар асари ин сӯхтор донишҷӯёни соли дуюми таҳсил Мудассир Исмоилов (факултаи филолгияи тоҷик) ва Неъматулло Ҳусейнов (факултаи физика ва риёзӣ) ба ҳалокат расидааснд. «Онҳо шабона дар ин коргоҳ кор мекарданд», - гуфт манбаъ.

Аз рӯи ин далел мақомоти прокуратураи шаҳри Қӯрғонтеппа тафтишро оғоз намудааст.