Саломат Пирова, сокини 23-солаи ноҳияи Вахш ҳамроҳ бо се тифли хурдсолаш кӯшиши худкушӣ карда, боиси ҳалокати се кӯдакаш шудааст. Худи зан аз дарёи Вахш зинда берун оварда шуд. Дар ин бора Радиои Озодӣ хабар медиҳад.

Ин ҳодиса рӯзи 21 сентябр дар ноҳияи Вахш рух додааст. Он рӯз, Саломат Пирова хонаи ҳамсарро оташ зада, худ ва се кӯдакашро ба дарё партофтааст. Дар ин ҳодиса ҳарсе кӯдаки зан ҷон дода, худи ӯ зинда берун оварда шуд. Кӯдакони фавтида -  Алишери 4−сола, Садбарги 2−сола ва Сумайяи 6−моҳа мебошанд.

Худи Пироваро ҳамдеҳагон  зинда, вале дар ҳолати беҳушӣ аз об берун оварданд ва ҳоло ӯ дар беморхонаи Вахш бистарӣ мебошад. Ҳанӯз ангезаи даст ба худкушӣ задани ин зан, ки боиси ҳалокати фарзандон шудааст, маълум нест.

Хабарнигори радиои Озодӣ, ки ин мавзӯъро таҳқиқ дорад, гуфтааст, дар назари аввал, зиндагии Пирова хеле хоксорона менамояд ва зоҳиран  ӯву шавҳараш зиндагии фақиронаеро доштаанд. Ҳамсари Саломат Пирова - Аҳлиддин Абдуллоев  то як ҳафта пеш бекор буд. Ҳамин 7-8 рӯзи охир кӯшиш мекард ҳамчун чекчин дар бозори маҳаллӣ пуле ба даст оварад. Ҳоло фарзияи асосии ин фоҷеа - фақру бебизоатии шадиди хонавода гуфта мешавад.

Ҳодисаи мазкур шабеҳи фоҷеае дар Душанбе аст, ки 5 июл дар Душанбе рух дод. Он рӯз як сокини ноҳияи Ёвон Парвина Абдуллоева ҳамроҳ бо се тифти ноболиғаш худро ба дарёи Душанбе андохт ва боиси ҳалокати фарзандонаш шуд. Худи ӯро зинда аз об берун оварданд. Ҳоло парвандаи ин занро додгоҳ баррасӣ мекунад ва бар тибқи арзёбиҳои пешакии ҳуқуқшиносон, ба ӯ аз 15 то 25 соли зиндон таҳдид мекунад.