Зимни ҳаракат аз шаҳри Хоруғ ба самти Душанбе автомашинаи тамғаи «Старекс» бо се мусофир зери сангреза монд.

Тавре сухангӯи Кумитаи ҳолатҳои фавқулода Умеда Юсуфӣ хабар дод, дар натиҷа ронанда, сокини ноҳияи Рӯшон Манучеҳр Раҳматуллоев дар ҷойи ҳодиса ҳалок ва се нафар мусофиронро наҷотдиҳандагони Кумита аз автомашина берун оварда, ба бемористони марказии ноҳияи Шамсиддини Шоҳин фиристодаанд.

Дар километри 225-уми роҳи мошингарди Душанбе - Кӯлоб - Хоруғ, дар мавзеи Хоҷағалтони ноҳияи Шамсиддини Шоҳин боришоти рӯзҳои охир ба сангфароӣ аз кӯҳҳо рӯи роҳ боис гардид.

Барои тозакунии роҳ техникаи махсуси Вазорати нақлиёт, ҳамчунин дастаи наҷотдиҳандагони зудамали Раёсати Кумитаи ҳолатҳои фавқулода дар минтақаи Кӯлоб сафарбар шуда, роҳ муваққатан баста шудааст. Танҳо барои гузаштани автомашинаҳои сабукрав аз ин қитъаи роҳ як хати хурди роҳ кушода аст.

Кумитаи ҳолатҳои фавқулода аз ронандагони воситаҳои нақлиёт хоҳиш мекунад, ки ҳушёру боэҳтиёт бошанд, зеро ҳодисаҳои сангфароӣ ба роҳҳо дар қитъаҳои роҳҳои кӯҳӣ аз эҳтимол дур нест.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.