Дар шаҳри Хуҷанди вилояти Суғд аз худкушии як зан пешгирӣ кардаанд. Ин зан худро ба дарё андохтааст.

Ҳодиса бегоҳии рӯзи 3-юми июл рух додааст. Ба иттилои Мирзораҳим Абдуллоев, сардори бахши Кумитаи ҳолатҳои фавқулода ва мудофиаи гражданӣ дар шаҳри Хуҷанд ин зан худро ба дарёи Сир партофтааст.

“Ин зан сокини 28-солаи ҷамоати Исфисори ноҳияи Бобоҷон Ғафуров буда, мехост бо роҳи ғарқшавӣ даст ба худкушӣ занад”, - гуфт Мирзораҳим Абдуллоев.

Ба иттилои ӯ, кормандони КҲФ вақти баргузории рейд шоҳиди ин ҳодиса шуда, дар зудтарин фурсат занро наҷот додаанд.

Бояд гуфт, ки даст ба худкушӣ задани сокинон яке аз мушкилҳои мубрами ҷомеа ба ҳисоб меравад. Танҳо соли 2023 дар Тоҷикистон 413 ҳолати суиқасд ба худкушӣ (соли 2022 - 415 ҳолат) ба қайд гирифта шудааст.

Бино ба маълумоти дастрасшуда, миёни шахсоне, ки даст ба худкушӣ задаанд, мардон зиёдтаранд - 215 ҳолат (соли 2022 - 212 ҳолат), байни занон - 198 ҳолат (соли 2022 - 203 ҳолат).

Шумори ҳодисаҳои худкушӣ байни ноболиғон 5 ҳолат зиёд шуда, ба 47 адад расидааст. 

Дар Telegram, Facebook ва Instagram бо мо бимонед.