Вазорати тандурустӣ ва ҳифзи иҷтимоии аҳолии Тоҷикистон вазъ ва теъдоди дақиқи зарардидагони садамаи мудҳиш дар ноҳияи Хуросонро шарҳ дод.

Ба иттилои дафтари матбуотии ин ниҳод, дар ин садама як нафар ҷон бохта, 11 нафар ҷароҳат бардошта, бистарии беморхона шудаанд. Вазъи сиҳатии 3 нафар ҷароҳатбардоштагон вазнин арзёбӣ мешавад.

Ба иттилои ин ниҳод, вазъи сиҳатии 6 нафар муътадил  буда, 2 нафари дигар баъди беҳбуди саломатӣ аз беморхона рухсат шудаанд.

Манбаъ афзудааст, ки табобати ҷароҳатбардоштаҳо ройгон ба роҳ монда шудааст.

Ҳамчунин, вазорат иттилоъ медиҳад, ки Ҷамолиддин Абдуллозода, вазири тандурустии кишвар ҷароҳатбардоштагонро аёдат карда, бо пйвандони онҳо сӯҳбат кардааст.

Пештар аз ин, Ғафур Муҳсинзода, муовини аввали вазири тандурустӣ ба хабаргирии захмишудаҳо рафта, бо вазъи саломатии онҳо шинос шуда буд.

Ҷамолиддин Абдуллозода ҳангоми аёдати осебдидагон
Акс аз дафтари матбуоти Вазорати тандурустӣ ва ҳифзи иҷтимоии аҳолӣ

Ёдовар мешавем, ки садамаи мудҳиши нақлиётӣ дар ноҳияи Хуросон 18-уми август, рух дод. Кумитаи ҳолатҳои фавқулода ва мудофиаи гражданӣ иттилоъ навишт, ки соатҳои 10:30 ба вақти маҳаллӣ мошини боркаши “Ҳино” таҳти идораи сокини 33-солаи ноҳияи Вахши вилояти Хатлон ҳангоми ҳаракат дар роҳи Душанбе-Бохтар дар даромадгоҳи ҳудуди ноҳияи Хуросон бинобар аз кор мондани василаи нигоҳдории мошин ба садама дучор шудааст.

Дар наворҳое, ки дар шабакаҳои иҷтимоӣ паҳн гардиданд, дида мешавад, ки мошини боркашони “Дулан” дар наздикии нуқтаи фурӯши сӯзишворӣ ба чанд мошини худрав бархӯрдааст.

Ҳамчунин гуфта мешавад, дар натиҷаи садама 7 воситаи нақлиёт зарар дидаанд.

Бояд гуфт, дар нимсолаи аввали соли ҷорӣ дар Тоҷикистон 539 ҳодисаи садамаи нақлиёт (соли 2023 - 492 ҳодиса) рух дода, бар асари онҳо 236 нафар ҳалок ва 570 нафар ҷароҳат бардоштаанд. Дар муқоиса бо ҳамин давраи соли гузашта шумори ҳодисаҳо 11,8%, теъдоди ҷабрдидагон 13,3% ва ҳалокшудагон 22,3% зиёд шудааст.

Дар Telegram, Facebook ва Instagram бо мо бимонед.