Хадамоти оташнишонии ноҳияи Рашт мегӯяд, дар як рӯз дар кӯҳу пуштаҳои минтақаи Рашт ду ҳодисаи сӯхтор сар задааст, ки сабаби оташгирии якум, оташбозӣ буда, омили сӯхтори дуввум то ҳол маълум нест.

Навори сӯхтор дар кӯҳҳои минтақаи Рашт дар рузҳои истироҳатӣ дар шабакаҳои иҷтимоӣ нашр шуд ва боиси нигаронии корбарон ва аҳолии маҳаллӣ гардид.

Аминҷон Қурбонзода, як масъули Хадамоти оташнишонӣ дар ноҳияи Рашт дар сӯҳбати телефонӣ ба “Азия-Плюс” гуфт, ҳарду ҳодиса рӯзи 15-уми август дар минтақаи Сари Пули шаҳракаи Ғарм ва дараи Камароби ноҳияи Рашт сар задаааст

Манбаъ афзуд, сӯхтор дар пуштаҳои минтақаи Сари Пули шаҳракаи Ғарм ҳудуди 10-12 гектарро фаро гирифта, сабаби он оташбозӣ мебошад. Он худи ҳамон рӯз, давоми 4 соат хомӯш карда шудааст.

Акс аз аз шабакаҳои иҷтимоӣ
“Сабаби оташ гирифтани дараи Камароб маълум нест ва оташ ҳудуди васеъро ҳам фаро нагирифтааст. Он танҳо ҳудуди 10-15 сотихро фаро гирифтаасту халос”- гуфт ӯ.

Манбаъ тасдиқ кард, ки айни ҳол сӯхтор пурра хомӯш карда шуда, ягон хатар вуҷуд надорад.

Пештар аз ин, 14-уми август дар кӯҳу теппаҳои назди сарҳадии вилояти Суғд низ сӯхтор сар зада буд, ки ба гуфтаи мақомот сӯхтор аз Ӯзбекистон гузаштааст.  

Сӯхтор гирифтани кӯҳу теппаҳои кишвар ду моҳи охир аҳолиро нигарон кардааст. Мақомот низ тасдиқ менамояд, ки имсол дар кишвар сӯхтор зиёд шудааст, ки сабаби он гармии зиёд ва бемасъулиятии бархе аз сокинон гуфта мешавад.  

Оҷонсии хоҷагии ҷангал дар нишасти матбуотии худ гуфт, имсол дар ҷангалҳои 9 шаҳру навоҳии кишвар сӯхтор сар зада, беш аз 434 гектарро фаро гирифтааст.

Қаблан, Агентии хоҷагии ҷангали Тоҷикистон аз мавсими хавфи сӯхтор дар минтақаҳои кӯҳӣ хабар дода, гуфта буд, ки хавфи сӯхтор аз 15-уми апрел то 15-уми ноябр давом мекунад.

Дар Telegram, Facebook ва Instagram бо мо бимонед.