Қӯрғонтеппа. 17-уми июл. ОИ «Азия-Плюс» - Дар шаҳри Қӯрғонтеппа ҳангоми порагирӣ корманди Маркази ташхиси тиббиву судии вилояти Хатлон Алиҷон Юлдошев боздошт гардид.

Аз Агентии назорати давлатии молиявӣ ва мубориза бо коррупсияи вилояти Хатлон ба ОИ «Азия-Плюс» хабар доданд, ки ӯ аз шаҳрванд Чорӣ Қурбонов ба миқдори 600 сомонӣ ришва ситониданӣ будааст.

Ба иттилои манбаъ, ташхисгар ба Ч.Қурбонов ваъда додааст, ки ба ивази маблағи додааш санади хулосаи ташхиси тиббии судиро ба шакли барои ӯ зарурӣ таҳия хоҳад сохт.

«Айни замон ташхисгар ба ҳабс гирифта шуда, нисбат ба ин далел парвандаи ҷиноӣ оғоз гардидааст», - афзуд сарчашма.