Душанбе. 14-уми август. ОИ «Азия-Плюс» - Дар шаҳри Душанбе кормандони Агентии назорати маводи нашъаовари назди президенти Тоҷикистон ба гумони даст доштан дар муомилоти ғайриқонунии маводи мухаддир шаҳрванди Афғонистон Ҳабибулло валади Ҳусейнро боздошт намуданд, ки зимни кофтуков аз ӯ ҳудуди 7 кило маводи сахттаъсир   ҳероин дарёфт ва мусодира карда шуд.

Нисбат ба даст доштан дар ин ҳодиса шаҳрванди Тоҷикистон, донишҷӯи факултаи иқтисодии Донишгоҳи давлатии миллии Тоҷикистон низ боздошт шудааст. Феълан гурӯҳи тафтишотӣ аз пайи муайян кардани шахсони дигари дастдошта дар ин ҷиноят машғул аст.

Бино ба иттилои манбаъ, нисбат ба ин далел тибқи моддаи 200-и Кодекси ҷиноии ҶТ (гардиши ғайриқонунии маводи мухаддир ё психотропӣ бо мақсади ба соҳибияти каси дигар додан) парвандаи ҷиноӣ боз шуда, тафтишот идома дорад.