Хуҷанд. 18-уми август. ОИ «Азия-Плюс» - Пас аз сӯҳбати телефонӣ бо шавҳар ҷавонзани 18-солаи ноҳияи Ғончӣ даст ба худкушӣ зад. Аз дафтари матбуоти Раёсати умури дохилии вилояти Суғд ба мухбири ОИ «Азия-Плюс» иттилоъ доданд, ки дар таърихи 17-уми август тақрибан соатҳои 8-и бегоҳ ҷавонзани 18-солаи деҳоти Далёни Поёни ноҳияи Ғончӣ Матлуба Раҳматова худро ба дор овехтааст.

Бино ба иттилои манбаъ, ҷавонзан пас аз сӯҳбати телефонӣ бо шавҳараш, ки дар Русия дар муҳоҷирати меҳнатӣ қарор дорад, ба худкушӣ даст задаст. Зимни азназаргузаронии ҷасади марҳум аломатҳои куштор бо роҳи зӯриву шиканҷа ба мушоҳида нарасидааст. Нисбат ба ин далел корҳои тафтишотӣ бурда мешаванд.