Душанбе. 20-уми август. ОИ «Азия-Плюс» - Шоми дирӯз кормандони раёсати ҷустуҷӯи ҷиноятии Вазорати умури дохилии Тоҷикистон зимни баргузории чорабиниҳои фавриву ҷустуҷӯӣ дар бозори «Дӯстӣ»-и пойтахт миқдори зиёди маводи сахттаъсири ҳероинро мусодира карданд.

Сардори дафтари матбуоти вазорат Маҳмадулло Асадуллоев ба ОИ «Азия-Плюс» хабар дод, ки сокини 39-солаи деҳаи Хирманҷои ноҳияи Шӯрообод Х.Д. ба гумони даст доштан дар нигоҳдории ғайриқонунии маводи мухаддир боздошт шуд.

«Ҳангоми азназаргузаронии борхалтаи сафарии ӯ ба миқдори 14,5 кило маводи ҳероин дарёфт ва мусодира карда шуд, - изҳор дошт манбаъ. - Тибқи хулосаи ташхисгарон маводи дарёфтшуда ҳероини сифати баланд мебошад».

Нашъаҷаллоб ба ҳабс гирифта шуда, нисбати аъмоли ӯ парвандаи ҷиноӣ боз гардид.