Душанбе. 11-уми сентябр. ОИ «Азия-Плюс» - Кормандони мақомоти ҳифзи ҳуқуқи ноҳияи Синои пойтахт ба гумони даст доштан дар қаллобӣ нозири шӯъбаи кадрҳои Ҷамъияти дорои масъулияти маҳдуди «Мовароуннаҳр» Хуршеда Ҳаитоваро боздошт намуданд.

Тибқи иттилои сардори дафтари матбуоти Вазорати умури дохилии ҷумҳурӣ Маҳмадулло Асадуллоев, боздоштшуда ба боварии сокини шаҳри Панҷакент Гулбаҳор Солиева даромада, аз ӯ бо роҳи фиреб 16 ҳазору 600 доллари амрикоӣ мегирад.

«Х.Ҳаитова ба ҷабрдида санадҳои тақаллубиро барои гирифтани манзили зист дар биное, ки дар кӯчаи Табачная сохтмонаш идома дорад, пешниҳод сохта, пас аз соҳиби маблағ шудан бедарак мешавад», - иттилоъ дод манбаъ. Аз рӯи ин далел парвандаи ҷиноӣ боз шудааст.