Душанбе. 24-уми сентябр. ОИ «Азия-Плюс» - Ду шаҳрванди Афғонистон, ки барои убури ғайриқонунии марз ва даст доштан дар муомилоти ғайриқонунии маводи мухаддир дар боздоштгоҳи муваққатии раёсати умури дохилии Вилояти Мухтори Кӯҳистони Бадахшон қарор доштанд, фирор кардаанд.

            Аз Вазорати умури дохилии ҷумҳурӣ ба ОИ «Азия-Плюс» хабар доданд, ки боздоштшудагон тақрибан соатҳои чори рӯз аз майдони сохтмони иншооти бинои нави боздоштгоҳи муваққатӣ гурехтаанд.

            Ба иттилои намояндаи вазорат, гурӯҳҳои тақвиятёфтаи мақомоти ҳифзи ҳуқуқи вилоят фавран ба ҷустуҷӯ шурӯъ кардаанд, вале аз он ҳеҷ натиҷае ба даст наомадааст. «Эҳтимол меравад, ки гурезаҳо сарҳадро убур намуда, ба қаламрави Афғонистон паноҳ бурдаанд ва ҷиҳати дастгир кардани онҳо бо мақомоти дахлдори Афғонистон гуфтушунид мешавад», - зикр кард манбаъ. Аз рӯи ин далел додситонии вилоят парвандаи ҷиноӣ оғоз кард.