Душанбе. 30-уми сентябр. ОИ «Азия-Плюс» - Кормандони Агентии назорати давлатии молиявӣ ва мубориза бо коррупсияи ҷумҳурӣ сардухтури беморхонаи кӯдаконаи сили шаҳри Душанбе Сафар Исмоиловро ҳангоми пора додан ба корманди агентии зиддикоррупсионӣ дастгир карданд.

Аз агентии номбурда ба ОИ «Азия-Плюс» хабар доданд, ки ҳангоми тафтиши фаъолияти хоҷагидории беморхона сардухтур ба корманди агентӣ барои рӯйпӯш кардани камбудиву норасоиҳо 1000 доллари амрикоӣ пора пешниҳод кардааст.

«Исмоилов ҳангоми додани пора дар утоқи кориаш дастгир шуда, айни замон нисбат ба аъмоли ӯ парвандаи ҷиноӣ боз карда шудааст», - афзуд манбаъ.