Душанбе. 2-юми октябр. ОИ «Азия-Плюс» - Тақрибан 50 нафар заноне, ки субҳи 30-уми сентябр дар назди бинои Раёсати Вазорати умури дохилӣ оид ба мубориза алайҳи ҷинояткории муташаккили шаҳраки Ғарми ноҳияи Рашт гирдиҳамоии ғайриқонунӣ баргузор намуда буданд, аз сардори ин раёсат, полковники милиса Мирзохӯҷа Аҳмадов талаб карданд, ки аз шахсони шубҳаноке, ки атрофи ӯ ҷамъ омадаанд, халос шавад. Дар ин бора ба ОИ «Азия-Плюс» роҳбари дафтари матбуоти Вазорати умури дохилии ҷумҳурӣ Муҳаммадулло Асадуллоев хабар дод.

Ба қавли ӯ, занон аз он изҳори норозигӣ кардаанд, ки ахиран дар гирду атрофи М.Аҳмадов шахсони шубҳаноке ҷамъ омадаанд, ки сокинони ин минтақа нестанд ва онҳо соҳиби силоҳи ғайриқонунӣ ҳам мебошанд.

«Худи ҳамон рӯз кормандони Раёсати Вазорати умури дохилӣ оид ба мубориза алайҳи ҷинояткории муташаккили шаҳраки Ғарми ноҳияи Рашт дар ҳамдастӣ бо намояндагони Вазорати умури дохилии ҷумҳурӣ, ки баҳри таъмини амнияти президенти Тоҷикистон зимни сафар ба водии Рашт дар он ҷо ҳузур доранд, ин шахсони шубҳанокро аз қаламрави минтақа хориҷ карданд», - афзуд манбаъ.

Ёдрас мекунем, ки имрӯз боздиди кории дурӯаи президенти Тоҷикистон Эмомалӣ Раҳмон аз гурӯҳи ноҳияҳои водии Рашт оғоз мегардад.