Душанбе. 24-уми ноябр. ОИ «Азия-Плюс» - Дар Тоҷикистон гурӯҳи сершумори қочоқчиёни маводи мухаддир ба даст афтод, ки муддати тӯлонӣ дар қаламрави водии Ҳисор ба муомилоти ғайриқонунии маводи мухаддир машғул буд.

Тавре аз Агентии назорати маводи нашъаовари назди президенти Тоҷикистон ба ОИ «Азия-Плюс» хабар доданд, аъзои фаъоли гурӯҳ зимни амалиёти вижа дастгир шуданд. «Амалиёти мазкур тӯли се моҳ идома дошт», - гуфт манбаъ.

Ба иттилои манбаъ, ҳангоми боздошт ҷинояткорон ба кормандони мақомоти ҳифзи ҳуқуқ муқобилати шадид нишон дода бошанд ҳам, дастгир карда шуданд. «Ҳангоми азназаргузаронии мошини онҳо 20 бастаи селлофанӣ бо ҳероин дарёфт ва мусодира карда шуд, ки вазни умумии он ба беш аз 18 кило баробар буд», - афзуд манбаъ.

Зикр гардид, ки аз рӯи ин далел парвандаи ҷиноӣ боз шуда, феълан аъзои дигари гурӯҳ ҷустуҷӯ карда мешаванд. Дар даҳ моҳи соли равон аз ҷониби кормандони агентӣ 1 тоннаву 260 кило маводи мухаддир мусодира карда шудааст, ки нисбат ба ҳамин давраи соли гузашта 318 кило ё худ 33,8 фоиз зиёдтар аст.