Душанбе. 11-уми декабр. ОИ «Азия-Плюс» - Дар мусоҳиба ба хабарнигори ОИ «Азия-Плюс» афсари Дафтари САҲА дар Тоҷикистон Паём Фурӯғӣ изҳор дошт, ки масъалаи тасдиқ нашудани Протоколи Кумитаи байнулмилалии Салиби Сурх дар бораи риояи ҳуқуқи маҳбусон - яке аз масъалаҳои ҳалнагардида оид ба иҷрои ӯҳдадориҳои байнулмилалии Тоҷикистон дар соҳаи риояи ҳуқуқи инсон мебошад.

Ба гуфтаи ӯ, вазъи риояи ҳуқуқи маҳбусон дар Тоҷикистон дар муқоиса бо чанде аз кишварҳои ҳамсоя он қадр ташвишовар набошад ҳам, тасдиқи протоколи номбурда ба шаффофияту дастрасии бештар ба фаъолияти муассисаҳои ислоҳӣ ва бартараф сохтани озору шиканҷаҳои ҷойдошта мусоидат хоҳад кард.

Коршиноси байнулмилалӣ оид ба риояи ҳуқуқи инсон Лилия Захариева зикр кард, ки миёни кишврҳои минтақаи Осиёи Марказӣ танҳо Қазоқистон ин протоколро тасдиқ кардааст. «Умедворам, ки кишварҳои дигари минтақа низ иқдоми Қазоқистонро пайгирӣ карда, ӯҳдадориҳои байнулмилалии худро дар соҳаи риояи ҳуқуқи инсон ба иҷро мерасонанд», - афзуд ӯ.