Душанбе. 25-уми декабр. ОИ «Азия-Плюс» - Шабонарӯзи гузашта кормандони мақомоти ҳифзи ҳуқуқи ҷумҳурӣ ҳудуди 5 кило маводи мухаддирро мусодира карданд.

            Тавре аз вазорати умури дохилии ҷумҳурӣ ба ОИ «Азия-Плюс» хабар доданд, зимни баргузории амалиёти махсус кормандони Раёсати мубориза бо муомилоти ғайриқонунии маводи мухаддир ду нафар сокини 32-сола ва 21-солаи шаҳри Турсунзодаро боздошт намуданд. Зимни кофтуков аз сумкаи варзишии онҳо ба миқдори 2 кило маводи сахттаъсири ҳероин дарёфт ва мусодира карда шуд.

            Ба иттилои манбаъ, кормандони мақомоти ҳифзи ҳуқуқи вилояти Хатлон дар ноҳияи Ҳамадонӣ ҳангоми азназаргузаронии мошини шаҳрванди 59-сола аз сумкаи мусофири он, зани 30-сола ба миқдори 2,5 кило маводи афюн дарёфт ва мусодира карданд. «Ҳангоми кофтукови манзили зисти зан боз 620 грамми дигар чунин мавод дарёфт шуд», - афзуд манбаъ. Бо сабаби идомаи корҳои тафтишотӣ аз ифшои ному насаби боздоштшудагон худдорӣ карда шуд.