Душанбе. 8-уми январ. ОИ «Азия-Плюс» - Кормандони Раёсати кофтукови ҷиноии Вазорати умури дохилаи Тоҷикистон як зани ҷавон - сокини шаҳри Душанберо ҳангоми кӯшиши фурӯши кӯдаки навзодаш боздошт карданд.

Тавре ба ОИ «Азия-Плюс» сухангӯи вазорати умури дохилаи кишвар - Маҳмадулло Асадуллоев хабар дод, кормандони раёсат дар таваллудхонаи рақами 1-и шаҳри Душанбе модари тифли навзод Фарзона Хоҷаеваи 24-соларо ҳангоме ки вай писарашро бар ивази 200 доллар ба шаҳрванд Шаҳло Маликоваи 32-сола мефурӯхт, дастгир намуданд.

«Аз рӯи ин далел нисбат ба ҳарду зан парвандаи ҷиноӣ боз гардидааст», - гуфт Асадуллоев ва афзуд, ки кӯдаки навзод барои нигоҳубин ба дасти хешовандон супорида шудааст.