Душанбе. 8-уми январ. ОИ «Азия-Плюс» - Дар қаламрави Тоҷикистон ҷараёни мазҳабии «Салафия» ғайриқонунӣ эълон гардид.

Тавре аз Додгоҳи Олӣ ба ОИ «Азия-Плюс» хабар доданд, қарори мазкурро Додгоҳи Олӣ дар асоси даъвои Додситонии кулли ҷумҳурӣ қабул кард. Ҳукумати Тоҷикистон қабули қарори мазкурро чун далели ҳифзи сохти конститутсионӣ, таҳкими амнияти миллӣ ва пешгирии сар задани низоъҳои байнимазҳабӣ маънидод мекунад.

Ҳамин тариқ, аз 8-уми январи соли 2009 фаъолияти ҷараёни мазҳабии «Салафия» дар қаламрави ҷумҳурӣ ғайриқонунӣ дониста мешавад.

Ғайр аз ин, тибқи муқаррароти қонуни мазкур, ворид сохтан ва паҳну таблиғ намудани адабиёт ва дигар маводи тарғибкунандаи ақидаҳои ҷараёни «Салафия» низ дар Тоҷикистон мамнӯъ эълон карда шуд.