Душанбе. 13-уми январ. ОИ «Азия-Плюс» - Зимни нишасти матбуотӣ додситони кулли ҷумҳурӣ Бобоҷон Бобохонов фаъолияти Агентии назорати давлатии молиявӣ ва мубориза бо коррупсияро ғайриқаноатбахш арзёбӣ кард.

            Додситони кулл зикр кард, ки тайи соли ахир агентӣ ба додситонӣ парвандаҳои марбут ба ҷиноёти коррупсиониро ба маблағҳои зиёд ирсол накардааст ва «ин дар ҳолест, ки дар ҳисоботҳо онҳо оид ба парвандаҳо бо маблағҳои ҳафтрақама ҳарф мезананд».

            «Ҷуброни маблағҳои хисорот дар муқоиса бо солҳои пешин кам шудаанд, зеро дар фаъолияти ин агентӣ камбуду норасоиҳои зиёд ҷой доранд ва парвандаҳои омодасохтаи онҳо ба тафтишоти иловагӣ ниёз доранд, - гуфт Б.Бобохонов. – Ҳарчанд мо кӯшиш ба харҷ медиҳем, ки онҳоро ҳамаҷониба дастгирӣ намоем, вале ошкоро бояд гуфт, ки агентӣ аз иҷрои вазифаҳои ба ӯҳда гирифтааш ба хубӣ намебарояд».

Ёдрас мекунем, ки Агентии назорати давлатии молиявӣ ва мубориза бо коррупсия аввали соли 2008 таъсис дода шуд.