Душанбе. 27-уми феврал. ОИ «Азия-Плюс» - Шумораи навбатии маҷаллаи солонаи Агентии назорати маводи мухаддири назди президенти Ҷумҳурии Тоҷикистон «Шарҳи вазъи вобаста ба маводи нашъадор дар Ҷумҳурии Тоҷикистон дар соли 2008» аз чоп баромад.

Тавре ба ОИ «Азия-Плюс» сардори шӯъбаи мусоидат бо ҷомеаи агентӣ Саъдулло Раҳматуллоев хабар дод, шарҳи мазкур бо мусоидати молии Маркази Созмони амният ва ҳамкории Аврупо дар Тоҷикистон ба табъ расидааст.

Дар маҷалла, аз ҷумла вобаста ба назорати маводи мухаддир ва мубориза алайҳи гардиши ғайриқонунии мухаддарот, моддаҳои психотропӣ ва прекурсорҳо дар Тоҷикистон, пешгирӣ аз нашъамандӣ ва дар бораи ҳамкориҳои ниҳодҳои байналмилалии зиддимухаддарот шарҳу маълумот гирд оварда шудааст.