Душанбе. 17-уми март. ОИ «Азия-Плюс» - Имрӯз дар Кумитаи иҷроияи Иттиҳоди Давлатҳои Мустақил дар шаҳри Минск машварати дурӯзаи гурӯҳи коршиносон оид ба таҳияи дубора ва мувофиқасозии Қарорҳо ва Муқаррарот дар бораи Комиссияи кишварҳои иттиҳод оид ба масъалаҳои ҳамкорӣ дар бахши мубориза бо муомилоти ғайриқонунии маводи мухаддир баргузор мешавад.

Тибқи иттилои хадамоти матбуоти Кумитаи иҷроияи ИДМ, ҳуҷҷатҳои мазкур аз ҷониби Тоҷикистон таҳия шудаанд ва ҷиҳати рушди ҳамкориҳо дар ин соҳа аксари кишварҳои узви иттиҳод манфиатдоранд. Як қатор асноди асосӣ оид ба ин масъала аз ҷониби сарони 10 кишварҳо маъқул шуморида шудааст.

Дар иттилои хадамоти матбуоти кумитаи иҷроия гуфта мешавад, ки феълан ба масъалаи мубориза бо муомилоти ғайриқонунии маводи мухаддир дар ҳайати мақомоти ИДМ сохторҳои назорати маводи нашъаовар (Русия, Тоҷикистон) ва воҳидҳои вазорати умури дохилӣ (милиса) машғул буда, ҳамчунин дар чаҳорчӯбаи ИДМ дар ин самт мувофиқи салоҳияти худ Шӯрои вазирони умури дохилии кишварҳо ва Дафтари ҳамоҳангсозии ҳамкорӣ баҳри мубориза бо ин падидаи номатлуб низ фаъолият мекунанд.