Душанбе. 23-юми июн. «Азия-Плюс» — | Ба далели бетартибиҳои оммавие, ки пас аз вохӯрии дастахои фтуболи «ССКА-Помир» (Душанбе) ва «Равшан» (Кӯлоб) дар пойтахт ба вуқӯъ пайвастанд, 40 нафар боздошт ва мутобиқи моддаи «Авбошӣ» парвандаи ҷиноӣ боз шуд.

Тавре ба ОИ «Азия-Плюс» сардори  сарситоди Вазорати корҳои дохилии ҷумҳурӣ Тоҳир Норматов хабар дод, шоми дирӯз пас аз анҷоми вохӯрии дастаҳои «ССКА-Помир» ва «Равшан», ки бо ҳисоби 2 бар 3 ба фоидаи меҳмонон анҷом ёфт, мухлисон ба кӯча баромада, роҳи гузарро бастаанд. «Онҳо ба талаби кормандони милиса бобати кушодани роҳ аҳамият надода, ба шикастани шишаҳои тирезаҳои автомашинаҳои дар наздикиҳо қарордошта оғоз намуданд», - гуфт ӯ.

Т.Норматов мегӯяд, ҳаҷми зарар он қадр зиёд набуд, шишаҳои тирезаи пеши се автомашинаи дар наздикии варзишгоҳи «Политехникум» қарордошта шикаста шуданд. «Дигар зарар ва ҷабридидагон ба қайд гирифта нашудаанд», - таъкид сохт номбурда.

Бино ба маълумоти Вазорати корҳои дохилии ҷумҳурӣ, дар ҳодисаи ба вуқӯъ пайвастани беназмиҳо мухлисони дастаи «Равшан» даст доранд. Аз рӯйи ин далел тафтишот идома дорад.

Акс аз саҳифаи дасти футболи «Равшан» дар Facebook