Хуҷанд. 23-юми июн. «Азия-Плюс» — | Дар вилояти Суғд як шаҳрванди Қирғизистон бо ҳудуди 10 кило маводи мухаддири навъи ҳашиш боздошт шуд.

Тавре ба ОИ «Азия-Плюс» аз Раёсати корҳои дохилии вилоят хабар доданд, зимни баргузории корҳои фаврӣ-ҷустуҷӯйӣ дар роҳи мошингарди Саидқӯрғон-Оқтеппаи ноҳияи Спитамен ба гумони даст доштан дар муомилоти ғайриқонунии маводи мухаддир сокини деҳаи Қӯрғани ноҳияи Лайлаки Қирғизистон Сайдулло Сангинов боздошт шудааст. «Зимни кофтукови борахалтаи ӯ аз дохили он 10 бастаи дорои маводи мухаддири ҳашиш, ки вазни умумиаш 9 килову 130 граммро ташкил дод, дарёфт ва мусодира карда шуд», - гуфтанд дар раёсат.

Зикр гардид, ки дар робита ба ин қазия нисбат ба аъмоли шаҳрванди Қирғизистон мутобиқи моддаи 200, қисми 4-и КҶ ҶТ (Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан) парвандаи ҷиноӣ боз шуда, тафтишот идома дорад.

Бино ба маълумоти Раёсати Агентии назорати маводи нашъаовари вилояти Суғд, дар зарфи 5 моҳи соли ҷорӣ аз ҷониби ҳамаи сохторҳои мақомоти ҳифзи ҳуқуқи минтақаи шимоли кишвар аз гардиши ғайриқонунӣ 338 кило маводи мухаддир (дар ҳамин давраи соли 2010 – 98 кило) дарёфт ва мусодира шудааст.