Директори бойгонии ноҳияи Бобоҷон Ғафурови вилояти Суғд ба ришваситонӣ ва тақаллубкории аснод гумонбар дониста мешавад.

Бино ба маълумоти Раёсати корҳои дохилии вилояти Суғд, соли гузашта сокини 29-солаи бекори ҷамоати Унҷии ноҳияи мазкур Фаррух Султонов ба боварии се нафар сокинони ҷамоатҳои Усмон ва Унҷӣ даромада, ба онҳо ба маблағи 17,5 ҳазор доллари ИМА 0,18 га қитъаи замини ба ӯ тааллуқнадоштаро мефурӯшад.

Ахири моҳи июл соли гузашта Ф. Султонов ба директори бойгонии ноҳияи Бобоҷон Ғафуров Саидёқуб Темиров муроҷиат намуда, ба ивази 1,5 ҳазор доллари ИМА аз ӯ дархост мекунад, ки қитъаҳои замини ғайриқонунӣ фурӯхтаашро ба номи харидорон расман ҳуҷҷатгузорӣ намояд.

Дар таърихи 18-уми августи соли равон додситонии ноҳия мутобиқи моддаҳои дахлдори Кодекси ҷиноии ҶТ нисбат ба директори бойгонӣ ва шаҳрванд Ф. Султонов парвандаи ҷиноӣ боз намуд ва феълан корҳои тафтишотӣ идома доранд.

Мувофиқи маълумоти Раёсати корҳои дохилии вилояти Суғд, тайи 6 моҳи соли равон дар минтақаи шимоли ҷумҳурӣ 30 ҳодисаи қаллобӣ (ҳамин давраи соли 2010 – 20 ҳодиса) ва 22 далели ришваситонии шахсони мансабдор (соли 2010 – 22 далел) ба қайд гирифта шудааст.