Мудири дорухонаи яке аз қисмҳои низомии вилояти Суғд ҳангоми гирифтани пора ба маблағи 2 ҳазор доллари ИМА бо далели шайъӣ боздошт гардид. Дар ин бора ба ОИ «Азия-плюс» аз Раёсати умури дохилии вилоят хабар доданд.

Бино ба иттилои манбаъ, ба шӯъбаи корҳои дохилии шаҳри Истаравшан аз номи сокини ҳамин шаҳр Ш.З. ариза ворид гардидааст. «Дар ариза зикр шудааст, ки мудири дорухонаи қисми низомии 2042-и Кумитаи давлатии амнияти миллӣ прапоршик Р.Г. ваъда додааст, ки ба ивази 2 ҳазор доллари ИМА ба сокини 21-солаи шаҳри Истаравшан билети ҳарбӣ гирифта медиҳад», - гуфтанд дар РКД.

Ҳангоми гирифтани маблағи пулӣ гумонбаршуда боздошт гардида, далели шайъӣ мусодира гардид. Нисбат ба мудири дорухона аз ҷониби прокуратураи гарнизони вилояти Суғд парвандаи ҷиноӣ боз шуда, корҳои тафтишотӣ идома доранд.