Кормандони милиса шаби фарорасии Соли нав беш аз 35 кило маводи мухаддирро мусодира намуданд.

Тавре ба ОИ «Азия-Плюс» аз Вазорати корҳои дохилии ҷумҳурӣ иттилоъ доданд, рӯзи 31-уми декабр дар ноҳияи наздимарзии Шӯрообод ба гумони даст доштан дар муомилоти ғайриқонунии маводи мухаддир П.Е.-и 32-солаи бекор боздошт гардида, зимни кофтукови шахсии ӯ 8,5 кило маводи мухаддири бангдона ва аз манзили шахсиаш боз 27 кило чунин навъи маводи мухаддир дарёфт ва мусодира карда шудааст.

Муайян карда шудааст, ки боздоштшуда ин миқдор маводи мухаддирро аз ду сокини маҳаллӣ дастрас кардааст, ки яке аз онҳо ҷангалбони хоҷагии ҷангали «Дашти Ҷум» мебошад.

Ба иттилои манбаъ, чанд рӯзе пеш бо як миқдор маводи мухаддири героин роҳбалади қатораи мусофирбари «Душанбе-Маскав» О.Н. боздошт шудааст. «Ҳангоми кофтукови бағочи дастии ӯ ҳудуди 5 кило героин дарёфт ва мусодира карда шуд», - гуфтанд дар вазорат ва афзуданд, ки ҷиҳати муайян кардани дигар шахсони дар ин ҷиноят дастдошта чораҳо андешида мешаванд.

Қобили зикр аст, ки соли гузашта кормандони Вазорати корҳои дохилии ҷумҳурӣ аз муомилоти ғайриқонунӣ ҳудуди 1,9 тонна маводи мухаддирро мусодира намуданд, ки аз ин миқдор 131,5 килояшро афюн, 236,5 килояшро героин ва боқимондаро маводи нашъаовари гурӯҳи каннабис ташкил медиҳанд.