Суди шаҳри Исфара шаҳрванди Қирғизистонро барои даст доштан дар муомилоти ғайриқонунии маводи нашъаовар ба 14 соли зиндон маҳкум кард.

Тавре ба ОИ «Азия-Плюс» аз суди шаҳри Исфара хабар доданд, чанде қабл мурофиаи судӣ нисбат ба шаҳрванди 46-солаи Қирғизистон Абдулҳаким Матиброҳимов ба анҷом расидааст.

Суд шаҳрванди Қирғизистонро ба содир намудани ҷиноятҳо тибқи моддаҳои 200, қ. 4 (Муомилоти ғайриқонунии маводи нашъаовар), 32, қ. 3 (Тайёрӣ ба содир намудани ҷиноят) ва 289, қ 2 (Қочоқ)-и КҶ ҶТ гунаҳкор дониста, ӯро ба муддати 14 соли зиндони низомаш шадид бо мусодираи амвол маҳкум намуд.

Ба иттилои манбаъ, Матиброҳимов моҳи октябри соли гузашта дар қаламрави деҳоти Лаккони ноҳияи Исфара боздошт шуда буд. Зимни кофтукови шахсӣ аз ӯ 20 кило маводи мухаддири героин дарёфт шуда буд. Боздоштшуда ният дошт, ки ин миқдор маводи мухаддирро ба Қирғизистон интиқол диҳад.