Дар нимсолаи аввали соли равон 56 парвандаи ҷиноӣ нисбат ба аъзои созмонҳои динии ифротгароӣ, ки сокинони вилояти Суғд мебошанд, ба суд ирсол гардид.

Зимни нишасти хабарӣ прокурори вилоят Шариф Қурбонов дар робита ба ин масъала изҳор кард, ки 56 нафари гумонбаршуда ба узвият дар созмонҳои ифротгароӣ дар ҳафт парвандаи ҷиноӣ ҳузур доранд.

«Миёни онҳо 54 нафар ба узвият дар созмони  «Ҳаракати исломии Ӯзбекистон» ва ду нафар ба даст доштан дар фаъолияти ҳизби ифротгарои «Ҳизб-ут-Таҳрир» гумонбар дониста мешаванд», - гуфт ӯ.

Ӯ ҳамчунин қайд кард, аз оғози сол дар мақомоти прокуратураи вилоят 293 парвандаи ҷиноӣ боз шудааст, ки 54 адади он хусусияти коррупсионӣ доранд.

Ба қавли Ш.Қурбонов, дар ин давра тибқи натиҷаи санҷишҳои прокурорӣ 1894 таъинот ва 735 пешниҳод содир шуда, барои бекор кардани қарорҳои ғайриқонунӣ 1169 эътироз оарда шудааст.

Ба гуфтаи прокурор, дар асоси ҳуҷҷатҳои дахлдор 901 нафар шаҳрвандон ба ҷавобгарии интизомӣ, 424 тан ба ҷавобгарии молиявӣ ва 2351 нафар ба ҷавобгарии маъмурӣ ҷалб карда шудаанд.

Прокурори вилоят зикр кард, ки дар натиҷаи санҷишҳои прокурорӣ 36,8 гектар замини мавриди истифодаи ғайриқонунӣ қарордошта ба ҳолати аввалаашон баргардонида шуданд.

«Пас аз дахолати прокурорӣ ҳаҷми зарари расонидашуда ба давлат ба маблағи беш аз 30,9 млн. сомонӣ рӯёнида шуд, ки маблағи андозҳои пардохтнашуда 17,4 млн. сомониро ташкил дод», - афзуд Ш.Қурбонов.