Суди ноҳияи Қубодиён сокини навбатии деҳаи Қизил Нишон Аслиддин Наврӯзовро ба 8 соли зиндон маҳкум кард.

Тавре ба ОИ «Азия-Плюс» ҳимоятгари маҳкумшуда Толиб Ортиқов хабар дод, А.Наврӯзовро суд дар содир намудани ҷинояти ташкили гурӯҳи ҷиноятпеша (моддаи 187, қ. 2-и КҶ ҶТ) гунаҳкор донистааст. «Ба андешаи тафтишот, А.Наврӯзов ба сафи Ҳаракати исломии Ӯзбекистон (ҲИӮ) шомил гардида, мутназам бо ҳаммаслакони худ, ки барои узвият ба ин ҳаракат мавриди ҷустуҷӯ қарор доранд, дар тамос будааст, аммо дар ҷараёни тафтишоти пешакӣ ва ҳам дар мурофиаи судӣ гуноҳи зерҳимояи ман исбот нагардид», - гуфт вай.

Ба қавли Ортиқов, суд ба далелҳои овардаи ҷониби ҳимоя эътибор надода, А.Наврӯзовро ба 8 соли зиндон маҳкум кардааст ва ӯ аз болои ҳукми суд ба зинаи болоӣ шикоят бурданист.

Ёдрас мекунем, ки А.Наврӯзов санаи 5-уми майи соли равон ба гумони узвият дар ҲИӮ боздошт шуда буд. Аз оғози сол панҷ нафар сокинони деҳаи Қизил Нишон ба узвият дар ин ҳаракат гунаҳкор дониста шуда, ба муҳлатҳои то 9 сол равона зиндон шуданд.

Тибқи маълумоти ғайрирасмӣ, айни замон беш аз 20 нафар сокинони деҳаи Қизил Нишон таҳти пайгарди қонунӣ қарор доранд.