Суди ҳарбии гарнизони Хатлон ба баррасии парвандаи ҷиноӣ нисбат ба афсари Вазорати мудофиаи Тоҷикистон оғоз намуд.

Тавре ба ОИ «Азия-Плюс» раиси суди ҳарбӣ Тоҳир Искандаров хабар дод, собиқ афсари қисми низомии 07017-и Вазорати мудофиаи ҷумҳурӣ, майор Исломҷон Иброҳимов ва шаҳрванди қаторӣ Қурбоналӣ Шодмонов мутобиқи моддаи 200, қ. 3, бандҳои «в, г» (Муомилоти ғайриқонунии воситаҳои нашъадор ё моддаҳои психотропӣ бо  мақсади   ба соҳибияти каси дигар додан аз ҷониби гурўҳи шахсон бо маслиҳати пешакӣ ва ба миқдори калон)-и КҶ ҶТ айбдор карда мешаванд.

Ба гуфтаи Т.Искандаров, санаи 15-уми июли соли равон як корманди фаврии Раёсати ВКД ҶТ дар вилояти Хатлон бо Исломҷон Иброҳимов дар тамос шуда, ба ӯ пешниҳод кардааст, ки ба ивази автомашинаи тамғаи «Опел» маводи мухаддири дар дасташ бударо ба ӯ диҳад.

Ба қавли ӯ, рӯзи дигар дар қаламрави бозори фурӯши автомобилҳои шаҳри Кӯрғонтеппа кормандони милиса И.Иброҳимов ва Қ.Шодмоновро бо далели шайъӣ дастгир намудаанд. «Агар гуноҳи И.Иброҳимов ва Қ.Шодмонов мутобиқи моддаи зикршудаи Кодекси ҷиноӣ исбот гардад, онҳоро ҷазои аз 8 то 19 соли зиндон интизор аст», - афзуд номбурда.