Мақомоти прокуратура тафтишоти парвандаи ҷиноӣ нисбат ба вакили Маҷлиси вакилони халқи ноҳияи Мӯъминобод, сардори кумитаи заминсозии ноҳия Мирзосафар Гулаҳмадови 56-соларо ба итмом расонида, ба суд ирсол намуд.

Тавре ба ОИ «Азия-Плюс» як манбаъ аз мақомоти прокураура иттилоъ дод, вакил дар ришваситонӣ ба маблағи 2 ҳазор доллари ИМА аз сокини 21-солаи маҳаллӣ  Зафари Маҳмадлатиф барои ҷудо кардани 2 гектар қитъаи замин ба ахирӣ гумонбар дониста мешавад.

«Иҷлосияи Маҷлиси вакилони халқи ноҳия дархост дар бораи бекор кардани дахолатнопазирии вакили гумонбаршуда ба порагириро мусбат ҳаллу фасл намуд, ки он барои анҷоми тамоми корҳои тафтишотӣ шароит муҳайё кард», - гуфт манбаъ.

Дар ҳамин ҳол, сардори Кумитаи заминсозии минтақаи Кӯлоб Тоҳир Саидов ба ОИ «Азия-Плюс» дар ин робита изҳор кард, ки бо фармони Кумитаи давлатии заминсозӣ ва геодезия, М.Гулаҳмадов аз мансаб сабукдӯш гардида, иҷрои вазифаи сардори кумитаи заминсозии ноҳия ба дӯши муовини сардор Шамсуддин Рабиев вогузор шудааст.