Суди шаҳри Қӯрғонтеппа дар фурсати наздиктарин парвандаи ҷиноии собиқ сарбози Қувваҳои Мусаллаҳи Тоҷикистон Саймуъмин Шоевро, ки соли 2010 пас аз ҳамлаи мусаллаҳона ба қатораи автомашинаҳои Вазорати мудофиа ҷон ба саломат бурда буд, баррасӣ намуда, ӯро ба муҳлати 1 сол шартан аз озодӣ маҳрум кард. Собиқ сарбоз ба ғайриқонунӣ ба манзили зист ворид шудан ва авбошӣ айбдор дониста шуд.

Тавре ба ОИ «Азия-Плюс» ҳимоятгари айбдоршаванда Акбар Ҳасанов хабар дод, дар мурофиаи навбатӣ ҳукми суд қироат гардида, Шоев аз толори суд озод карда шуд. Ба қавли ҳимоятгар зерҳимояаш аз қарори суд қаноатманд аст. Дар навбати худ, ҷониби ҷабрдида низ изҳор кардааст, ки ба ҳама гуна ҳукми суд розӣ хоҳад буд.

Ба гуфтаи айбдоркунандаи давлатӣ, С.Шоев бидуни иҷозати соҳибхона Холмаҳмад Қодиров ба манзили ӯ ворид шуда, барои лату кӯби шиносаш Насиба Давлатхоҷаева соҳибхонаро таҳқир ва мавриди лату кӯб қарор медиҳад.

Дар мурофиаи судӣ айбдоршаванда гуноҳи худро қисман эъттироф намуда, Насиба Давлатхоҷаева изҳор кард, ки ӯ оид ба мавриди лату кӯб қарор гирифтанаш аз ҷониби Холмурод Қодиров ба ШВКД-и шаҳри Қӯрғонтеппа шикоят бурдааст, вале кормандони милиса боз кардани парвандаи ҷиноиро рад кардаанд.

Ба қавли ҷабрдида Қодиров, ӯ ҳам ба мақомоти милиса оид ба оғоз кардани парвандаи ҷиноӣ нисбати Шоев аризаи даъвогии ҷавобӣ пешниҳод намуда, вале аризаи ӯ ҳам рад шудааст. Пас аз ин ӯ ба мақомоти прокуратураи вилоят ариза дода, прокуратураи шаҳр парвандаи ҷиноиро оғоз ва ба тафтишот шурӯъ кардааст.

Ҳимоятгари судшаванда дар суҳбат бо хабарнигори ОИ «Азия-Плюс» изҳор кард, ки зерҳимояи ӯ дар ҳамлаи мусаллаҳонаи дараи Камароб ҷароҳат бардошта, ҳолати рӯҳиаш то ҳанӯз хуб нест.