Шуъбаи тафтишоти Раёсати Агентии назорати давлатии молиявӣ ва мубориза бо коррупсияи вилояти Хатлон парвандаи ҷиноӣ нисбати собиқ сармуҳосиби бахши «Тоҷпромбонк» дар ноҳияи Ёвонро ба додгоҳ ирсол кард.

Тавре ба ОИ «Азия-Плюс» сардори шуъбаи пешгирии ҷиноятҳои зиддикорупсионии раёсат Ҳикматулло Исматов хабар дод, собиқ сармуҳосиби бахши «Тоҷпромбонк» дар ноҳияи Ёвон Наим Тағоев ба ғайриқонунӣ азхудкунии беш аз 731 ҳазор сомонӣ маблағ айбдор карда мешавад.

«Аз соли 2004 то соли 2006 ӯ ба ҳайси муҳосиб ва аз соли 2006 то соли 2009 ба сифати иҷрокунандаи вазифаи сармуҳосиби бахши бонк фаъолият намуда, тавассути сохтакории ҳуҷҷатҳои бонкӣ 731 ҳазору 315 сомониро ғайриқонунӣ азхуд ва бо ин амалаш ба бонк зарари бузурги молиявӣ расонид», - гуфт вай.

Ба қавли ӯ, парвандаи ҷиноӣ нисбати Н.Тағоев ҳанӯз соли 2010 оғоз гардида, вале ӯ рӯ ба гурез ниҳодааст ва сипас таҳти пайгарди қонунӣ эълон шудааст. «Моҳи феврали соли 2012 ӯ аз ҷониби кормандони пулиси шаҳри Твери Русия боздошт шуда, санаи 23-юми август ба мақомоти Тоҷикистон супурда шуд», - афзуд номбурда.