Беш аз 500 мизоҷи ширкати сохтмонии «Мовароуннаҳр» дубора ба соҳиби манзил шудан умедворӣ пайдо карданд.

Тавре ба ОИ «Азия-Плюс» иҷрокунандаи вазифаи мудири кулли ҶДММ «Мовароуннаҳр» Тӯрабек Охунов хабар дод, мувофиқи қарори чанде қабл содиршудаи Суди олии ҶТ, амволи ғайриманқули ширкат дар шакли иншооти сохтмонаш ниматамом аз «ҳоли ҳабс» озод гардида, сохтмонаш ба итмом мерасад.

Ба қавли номбурда, иншооти сохтмонаш ниматамоми ширкат аз 8 бинои баландошёна дар микрорайонҳои 82, 33 ва маҳаллаи Гипроземи пойтахт иборат аст.

«Амволи ғайриманқул муддати 2 солу 3 моҳ дар «ҳоли ҳабс» қарор дошт ва корҳои сохтмонӣ дар он қатъ шуда, пас аз маҳкум шудани роҳбари ширкат Ҷӯрабек Охунов бо мусодираи амвол , мизоҷони ширкат борҳо ҷиҳати манъи фурӯши ин иншоот ба Суди олӣ ва Прокуратураи генералӣ муроҷиат намуданд», - гуфт Т.Охунов.

Раиси ширкат Ҷӯрабек Охунов дар содир намудани ҷиноят мутобиқи ҳамаи моддаҳои пешниҳодшуда - ба қаллобӣ дар ҳаҷми ниҳоят зиёд, фаъолияти соҳибкории ғайриқонунӣ, расонидани зарар ба амвол тавассути фиреб ё суистеъмол аз боварӣ ва камомад гунаҳкор дониста шуд. Бо назардошти қонуни афв, аз муҳлати ҷазои ӯ 7 сол боқӣ мондааст.

Ширкати «Мовароуннаҳр» аз соли 2005 ба сохтмони ипотекии манзили зист машғул аст, аммо аз аҳолӣ қисман ё пурра маблағи сохтмони манзили зистро ҷамъоварӣ намуда, на ҳамаро бо манзили зисти ваъдагӣ таъмин кардааст.